संपन्न झालेले कार्यक्रम

मागील कार्यक्रम
पुढील कार्यक्रम

२८ फेब्रुवारी २०२१ राष्ट्रीय विज्ञान दिन - लेखन - सौ. उषा धस

🙏 राष्ट्रीय विज्ञान दिन - लेखन - सौ. उषा धस 🙏

आजचा विज्ञान दिन ऑनलाईन पद्धतीने साजरा करण्यात आला. सुरुवातीला शालेय प्रार्थना झाली. सौ. जाधव बाईंनी विज्ञानगीत ऑडिओरूपात सादर केले.सर्वांसाठी श्री. मोहीतेसर, श्री. बाईतकाका, कु मंदार, श्री. पाटील काका, श्री. मनोज दादा यांनी वसुंधरा गीत वाद्यांच्या साहाय्याने सादर केले.

त्यानंतर कार्यक्रमाचे प्रास्ताविक शाळेच्या पर्यवेक्षिका व विज्ञानशिक्षिका मा. सौ. मोरेबाई यांनी केले. त्यांनी आपल्या प्रास्ताविकेत दरवर्षी या दिवशी आपल्या शाळेला विज्ञान जत्रेचे स्वरूप प्राप्त झालेले असते पण कोरोनामुळे आलेल्या संकटांमुळे आज आपण हा दिवस ऑनलाईन पद्धतीने साजरा करणार आहोत. संकटावर मात करून मार्ग काढून आपण वैज्ञानिक दृष्टिकोन जोपासूया असे विद्यार्थ्यांना सांगितले.

डॉ सी. व्ही. रामन यांच्याविषयी माहिती व विज्ञान दिनाचे महत्त्व सांगणारा व्हिडीओ विद्यार्थांना दाखवण्यात आला. त्यानंतर विज्ञानातील चमत्कार व विज्ञानविषयक काही निवडक व्हिडिओ विद्यार्थ्यांना दाखवण्यात आले.


राष्ट्रीय विज्ञान दिनानिमित्त 5वी ते 7वी मधील काही विद्यार्थ्यांनी विज्ञान -चित्र व विज्ञान -भित्तीपत्रक, विज्ञान घोषवाक्य बनवले होते.

कु. शिवराज वर्तक (6ब ) व कु. लावण्या रिकामे (5ब )यांनी ऑडिओरूपात घोषवाक्ये सादर केली. गुगल फॉर्मद्वारे विज्ञान प्रश्नमंजुषा घेतली. व एका विज्ञानगीताने कार्यक्रमाची सांगता झाली.राष्ट्रीय विज्ञान दिनानिमित्त मा. मुख्याध्यापक, मा. पर्यवेक्षक, सर्व शिक्षक, शिक्षकेतर कर्मचारी यांनी विद्यार्थ्यांना शुभेच्छा दिल्या.🙏

२७  फेब्रुवारी २०२१ मराठी राजभाषा दिन - * दुपार अधिवेशन * लेखन - सौ. भावसार.

🙏 मराठी राजभाषा दिन - * दुपार अधिवेशन * लेखन - सौ. भावसार.🙏

दरवर्षीप्रमाणे 27 फेब्रुवारी 2021 या दिवशी सन्मित्र मंडळ विद्या मंदिर (गोरेगाव) शाळेचा ज्ञानपीठ पुरस्कार विजेते, कविश्रेष्ठ वि. वा. शिरवाडकर ऊर्फ कुसुमाग्रज यांच्या जन्मदिनी मराठी राजभाषा दिन साजरा करण्यात आला. यावर्षीच्या कोरोना महामारीच्या संकटामुळे हा दिनविशेष ऑनलाईन पद्धतीने साजरा करण्यात आला. इयत्ता सातवी ब च्या विद्यार्थ्यांनी या कार्यक्रमात उत्साहाने सहभाग घेतला. हा मराठी राजभाषा दिन वर्गनिहाय ऑनलाईन साजरा करण्यात आला. पाचवी ते सातवी चे वर्गशिक्षक यांनी वर्ग निहाय सूत्रसंचालन केले.

सर्वप्रथम प्रार्थना घेण्यात आली.नंतर गणेश वंदना सातवी ब मध्ये शिकणार्‍या शर्वरी जोशीच्या भरतनाट्यम् नृत्याने.नंतर माननीय मुख्याध्यापक श्री. गव्हाळे यांचे प्रास्ताविक प्रत्येक वर्गात ऐकविण्यात आले. त्यानंतर विद्यार्थ्यांनी कवी कुसुमाग्रज यांची माहिती व्हिडीओद्वारे ऐकली. तसेच श्री. गावडे यांचीही कवि कुसुमाग्रज यांच्याविषयी माहिती ऑडिओ द्वारे ऐकली. व्हीडिओ दाखवून'लाभले आम्हास भाग्य बोलतो मराठी' हे स्फूर्तिदायी मराठी भाषा अभिमानगीत सर्व वर्गात ऐकविण्यात आले. सौ.मांजरेकर यांनी राजभाषादिनाचे महत्त्व ऑडिओ द्वारे प्रत्येक वर्गात ऐकविण्यात आले.आधीच तयार करून ठेवलेल्या ऑडिओ, व्हिडिओच्या सहाय्याने काव्यवाचन, कथाकथन , संतांची माहिती, इत्यादी मराठी भाषेची थोरवी सांगणारे कार्यक्रम घेण्यात आले. विद्यार्थ्यांबरोबरच शिक्षकांनीही या कार्यक्रमात सादरीकरण केले. संत ज्ञानेश्वरांच्या पसायदानाने कार्यक्रमाचा समारोप करण्यात आला.

अशा प्रकारे ऑनलाईन कार्यक्रम सादर होत असतानाच प्रयोगशाळा सहाय्यक श्री. मोहिते,ग्रंथपाल श्रीमती चंद्रात्रे आणि इतर शिक्षकेतर कर्मचारी यांनी शाळेत महान लेखक,कवी, नाटककार, वि. वा. शिरवाडकर यांच्या प्रतिमेचे पूजन, फलक लेखन आणि सजावट करून कार्यक्रमाची व शाळेची शोभा वाढवली.

27 फेब्रुवारी मराठी राजभाषा दिन(2021) माननीय मुख्याध्यापक श्री. गव्हाळे, माननीय पर्यवेक्षक सौ. मोरे, सर्व शिक्षक, शिक्षकेतर कर्मचारी आणि विद्यार्थ्यांच्या सहकार्याने उत्साहात संपन्न झाला.

 🙏

४ फेब्रुवारी २०२१ सेवागौरव समारंभ - उत्सवमुर्ती- श्रीमती भाग्यलक्ष्मी इंजमुरी

🙏 सेवागौरव समारंभ - उत्सवमुर्ती- श्रीमती भाग्यलक्ष्मी इंजमुरी 🙏

आपल्या शाळेतील ज्येष्ठ शिक्षिका सौ. इंजमुरी बाई 32 वर्ष सेवा देऊन दिनांक 31 जानेवारी 2021 रोजी निवृत्त झाल्या. या कार्यक्रमाला संस्थेचे अध्यक्ष माननीय श्री जोशी सर, संयुक्त कार्यवाह माननीय श्री नानिवडेकर सर आणि व्यवस्थापक माननीय श्री कोंडेकर सर उपस्थित होते. संस्थेचे माननीय सदस्य श्री सोहनी सर उपस्थित होते . माध्यमिक विभागाचे माननीय मुख्याध्यापक श्री गव्हाळे सर ,माननीय पर्यवेक्षिका सौ. मोरे बाई, प्राथमिक विभागाच्या माननीय मुख्याध्यापिका सौ.सावंत बाई व पूर्व प्राथमिक विभागाच्या माननीय मुख्याध्यापिका सौ.भावे बाई , सर्व शिक्षक व शिक्षकेतर कर्मचारी उपस्थित होते.

श्रीमती चंद्रात्रे बाईनी नेहमीप्रमाणे छान रांगोळी व सजावट केली होती. कार्यक्रमाची सुरुवात ठीक 10.15 वा. झाली.सौ.इंजमुरी बाईंच्या हस्ते दीपप्रज्वलन व सरस्वती पूजन करण्यात आले. प्रार्थना गाऊन झाल्यानंतर माननीय मुख्याध्यापक श्री गव्हाळे सर यांनी प्रास्ताविक केले. शाळेच्या प्रथेप्रमाणे सौ. तांबे बाई व सौ. माने बाईनी सौ.इंजमुरी बाईंची ओटी भरून सत्कार केला. श्री. गावडे सर यांच्या हस्ते "श्री. स्वरुप इंजमुरी" सरांना शर्टपीस देण्यात आले.

सन्मित्र मंडळाकडून अध्यक्ष माननीय श्री.जोशी सर व संयुक्त कार्यवाह माननीय श्री. नानिवडेकर सरांकडून सौ.इंजमुरी बाईंना शाल, श्रीफळ ,सन्मानचिन्ह व सन्मानपत्र देण्यात आले. तसेच सर्व सन्मित्र परिवाराकडून (माध्यमिक ,प्राथमिक व पूर्व प्राथमिक) त्यांना भेटवस्तू देण्यात आली .

उत्सवमूर्ती च्या मानपत्राचे वाचन सौ.गावडे बाईंनी केले . सौ. मोरे बाईंनी सौ. इंजमुरे बाईंचे आवडते गाणे सुरेल आवाजात गायले.यानंतर शिक्षिका सौ. लाड बाई ,माध्यमिक विभागाचे श्री. गावडे सर, सौ. भावसार बाई,सौ.मांजरेकर बाई,श्रीम. चंद्रात्रे बाई, सौ.जाधव बाई यांनी आपले मनोगत व्यक्त केले. सुत्रसंचालन करताना सौ. धस बाईंनी मनोगत व्यक्त केले.. त्याच प्रमाणे माननीय पर्यवेक्षिका सौ. मोरे बाई, माननीय मुख्याध्यापक श्री .गव्हाळे सर व माननीय कोंडेकर सर यांनी मनोगत व्यक्त केले. सर्वांनी इंजमुरी बाईंचे निवृत्त जीवन हे सुखी, समृद्धी, आरोग्यदायी ,आनंदी जावो ही सदिच्छा व्यक्त केली.


श्री इंजमुरी सरांनी ही मनोगत व्यक्त केले. अध्यक्ष माननीय श्री. जोशी सरांनी उत्सवमूर्तीच्या भावी आयुष्यासाठी शुभेच्छा दिल्या.

सौ.इंजमुरी बाईंनी मनोगत व्यक्त करताना हीरक महोत्सवाच्या वेळी माजी विद्यार्थ्यांनी दिलेला मान व ध्वजारोहण करण्याचा मिळालेला सर्वोच्च सन्मान या आठवणीने त्या भावूक झालेल्या होत्या. संस्थेचे,शाळेचे व सर्व सहकारी यांचे त्यांनी आभार मानले .संस्थेप्रती कृतज्ञता व्यक्त करून संस्थेला देणगी दिली. संस्थेचे संयुक्त कार्यवाह माननीय श्री.नानिवडेकर सरांनी सर्वांचे आभार मानले.
कार्यक्रमाची सांगता सुश्राव्य गीताने झाली.अशाप्रकारे कार्यक्रम उत्साहपूर्ण वातावरणात पार पडला
🙏